A XUNTA PECHOU A VÍA DO SALNÉS MOVIDA POR INTERESES POLÍTICOS, LOGO DE DESBOTAR ALTERNATIVAS TÉCNICAS MENOS LESIVAS PARA OS USUARIOS

A Xunta de Galicia decidiu, unilateralmente, o peche da Vía do Salnés movida por intereses políticos, desbotando alternativas técnicas moito menos lesivas para os usuarios, segundo denunciou hoxe no Parlamento o voceiro de Infraestruturas do Grupo Popular, Alejandro Gómez Alonso, no transcurso do debate dunha interpelación dirixida á conselleira de Política Territorial.

Segundo denunciou o deputado popular, a conselleira María José Caride –que no anterior Pleno do Parlamento argumentou razóns de axenda, aínda non aclaradas, para gañar tempo e poder reabrir a vía antes de dar explicacións no hemiciclo- decidiu, unilateralmente, o peche da Vía do Salnés, durante 4 meses para substituír as tubaxes metálicas, poñendo en serio risco a integridade dos ocupantes dos máis de 15.000 vehículos diarios que foron desviados por estradas secundarias perigosas, a pesar de que dispoñía de informes técnicos que aseguraban que a intervención se podía acometer sen tomar unha medida tan drástica.

Argumentando un suposto risco para a seguridade viaria, a Xunta desviou deste xeito a atención informativa sobre os graves problemas que se estaban a rexistrar nas comarcas do Salnés e Vilagarcía como consecuencia dos incendios de agosto e as riadas do outono. Só no distrito forestal de Caldas-O Salnés arderon máis de 20.000 hectáreas, cifra que pode dar idea da magnitude do desastre e dos efectos derivados.

En Vilagarcía de Arousa, máis de 1.000 persoas perderon os seus vehículos como consecuencia das riadas, mentres que o propio alcalde socialista da localidade se queixaba do abandono do que foran obxecto por parte da Xunta e do Goberno central.

ESTRATEXIA PARA DESVIAR A ATENCIÓN INFORMATIVA

Ante este panorama, e unha vez que perderon toda credibilidade os intentos do presidente da Xunta por vincular as riadas con cuestións como o urbanismo para eludir a súa responsabilidade, mentres o descontento social ía en aumento, o Executivo galego buscou un novo golpe de efecto para derivar o centro de atención informativa: María José Caride anunciou, o pasado 5 de decembro, o peche indefinido, durante alomenos 5 meses, da Vía do Salnés, argumentando a imposibilidade de garantir a seguridade viaria.

A conselleira fixo pública a medida a pesar de dispoñer encima da súa mesa de estudos elaborados por enxeñeiros da Administración autonómica que demostraban a viabilidade técnica de substituír os tubos por estruturas de formigón, sen necesidade de pechar o vial ao tráfico rodado. Habería, simplemente, que coordinar o cambio dos tubos coas obras de desdobramento que xa están en marcha, aproveitando a nova plataformas para habilitar desvíos puntuais ao mesmo nivel e de idénticas características respecto ao trazado previamente existente.

A Xunta despregou unha estratexia propagandística para tratar de convencer á opinión pública de que os tubos metálicos empregados nesa vía, hai 15 anos eran propios de países terceiromundistas. Ocultou que as obras de desdobramento que se estaban a executar na Vía modificaron o réxime de canalizacións, ou que a comarca do Salnés foi unha das máis afectadas polos incendios do verán, que destruíron a cuberta vexetal do monte, que perdeu gran parte toda súa capacidade de absorción da chuvia e multiplicou o volume das escorrentías, afectando á propia estrutura da estrada.

O PRESIDENTE INCAPAZ

A xuízo de Gómez Alonso, este cúmulo de circunstancias fará que Touriño pase á historia como “o presidente incapaz” que tratou de dirixir un “Goberno sen precedentes”, que se viu incapaz de xestionar episodios adversos como os incendios e as riadas e continúa obsesionado por evitar que se investigue o sucedido.


Denunciou tamén o deputado popular que a conselleira de Política Territorial se nega con vehemencia a que a Comisión de Investigación sobre a Vía do Salnés, constituída no Parlamento de Galicia, poda efectuar indagacións sobre as alternativas plantexadas polos técnicos da Xunta para evitar o peche total á vía decretado pola Administración. Caride cursou tamén instrucións aos grupos políticos que apoian ao bipartito para impedir que a dita Comisión poda investigar o uso destes tubos noutras obras que está a executar actualmente noutros lugares de Galicia ese departamento autonómico.

A xuízo de Gómez Alonso, o Goberno galego négase sistematicamente a que se investigue a súa xestión e semella que foxen deste tipo de indagacións “coma do demo”, o que evidencia o elevado volume de información e de decisións anómalas que se empeñan en ocultar.

AXUDAS PARA OS AFECTADOS

Unha vez constatado o prexuízo causado polo peche da Vía do Salnés aos diferentes colectivos afectados –hosteleiros, confrarías de pescadores, depuradoras e cocedeiros de marisco, conserveiras e outras empresas implantadas nos polígonos industriais da comarca, que xeran un movemento de arredor de 200 camións diarios-, o PPdeG instará a Xunta que estableza unha liña de axudas económicas para compensar aos principais afectados.

O peche ao tráfico da vía do Salnés traduciuse en perdas de tempo de ata unha hora para algúns usuarios e elevadas perdas económicas para os sectores máis prexudicados.